Madiwani Ilala wataka mpango wa kurekebisha miundombinu kunusuru wananchi waliokuwa mabondeni

Meya wa halmshauri ya Ilala , Charles Kuyeko

Baadhi ya madiwani wakiwa kwenye kikao.

NA CHRISTINA MWAGALA, Dar es Salaam

KUFUATIA hali ya mvua inayoendelea kunyesha jijini Dar es Salaa , Madiwani wa Halmashauri ya Manispaa ya Ilala wamesema kuwa ipo haja ya kuweka mipango mikakati ya kurekebisha miundombinu.

Wakichangia katika kikao cha baraza la madiwani kilichofanyika katika ukumbi wa Anatoglo leo, madiwani hao wamesema kwamba hali ya mvua inayoendelea kunyesha imeharibu miundombinu ya barabara sambamba na kuathiri watu waliokuwa mabonde.

Mbunge wa jimbo la Ukonga wa Chama Cha Demokrasia na Maendeleo Chadema, Mwita Waitara amesema kwamba wananchi waliowengi wamejenga nyumba kwenye mikondo ya maji jambo ambali limesababisha kupoteza makazi yao .

Ameongeza  niukweli usipingia kwamba nyumba zilizojengwa kwenye mikondo ya maji, zilijengwa  kimakosa lakini cha kushangaza  madiwani waliopo kwenye maeneo yao wanashindwa kuwaeleza ukweli wananchi madhara ya jambo hilo.

Amesema  pamoja na mapungufu hayo, hivi sasa sio muda wa kuwalaumu wananchi badala yake ipo haya kama halmashauri kuweka mikakati ya kuwasaidia wananchi sambamba na kurekebisha mioundombinu hiyo.

“ Nikweli tunatakiwa kukubali kwamba , wananchi walijenga kwenye maeneo ambayo ni mikondo ya maji, na sisi kama viongozi tukiwa huko tunashindwa kuwaeleza ukweli wananchi wetu, ila ndio tayari yametokea, sasa tunapaswa kuweka mpango kwa mwaka mwingine wa mvua kwa ajili ya kurekebisha miundombinu” amesema Waitara.

Kwaupande wake Diwani wa Kata ya Kipawa wa Chama Cha Demokrasia na Maendeleo Chadema, Kenedy Thomas amasema kuwa hali ya miundombinu ambayo imekuwa kero kwenye maeneo mengi ndani ya halmashauri hiyo inapaswa kufanyiwa kazi mapema ili kuepuka kero zinazowapata wananchi hivi sasa.

Naye Diwani wa Kata ya Buyuni Twaha Malute wa Chama Cha Mapinduzi (CCM) ameiomba halmashauri kutenga fungu la zarula ili fedha hizo ziweze kusaidia kuziba mashimo yaliyopo katika kipindi hiki cha mvua.

Diwani huyo amesema kwamba maeneo mengi yameathirika na mvua na kwamba hakuna maeneo ya kupita jambo ambalo limenazidi kuwa kero kwa wananchi katika kipindi hiki kutokana na kujaa maji.

 “ Mheshimiwa Mwenyekiti (Meya wa halmashauri ya Ilala), hali ni mbaya kwenye kata zetu ambazo tunatoka, njia hazipitiki, niombe halmashauri itenge fungu la zarula turekebishe hii miundominu ili wananchi njia hizi zipitike kwa urahisi” amefafanua.

Akijibu hoja hizo kwa niaba ya Mkurugenzi wa halmashauri ya Ilala, Mkuu wa Idara ya miundombinu, ambaye pia ni Mhandisi Mkuu wa halmashauri, Benjamini Maziku ameeleza kuwa baada ya kumalizika kwa mvua watafanya tathimini ili kuona maeneo ambayo yameathirika vibaya na mvua na hivyo kufanya ukarabati.

Ameongeza kwamba kwa sasa hakuna kinachoweza kufanyika kutokana na hali ya mvua inayoendelea kunyesha ,akawaomba madiwani hao kuwa na subra ili kupisha kipindi hiki cha mvua kipite na hivyo waanze kufanya ukaratabati.

“ Naomba jamani tuwe na subra, najua jambo hili ni kero, lakini kwa sasa hatuwezi kufanya kitu, mikakati iliyopo ni kupisha mvua hii ambayo inanyesha hivi sasa, ili tufanye ukarabati wa maeneo ambayo yameathirika” amefafanua Mhandisi Maziku.

Kwaupande wake Meya wa halmashauri hiyo Charles Kuyeko amesema kwamba maeneo mengi yamekuwa na changamoto ya miundombinu na hivyo suala la ukaraabati litafanyika ili kuwepo na urahisi wa kupitika katika maeneo yote.